Niorina tamin’ny fiaraha-miasa, ny fifampianarana ary ny fandraisana anjara avy amin’ny mpiara-miombon’antoka eo an-toerana ny tetikasa. Hatramin’ny voalohany dia notanterahina tamin’ny fomba manokana sy mifandanja ny asa, niaraka tamin’ny vondrom-piarahamonina, ireo mpikaroka, ary ireo mpiara-miasa ara-panjakana manerana an’i Madagasikara.
Famolavolana niarahana ny fandaharam-pikarohana
Ny feon’ny mponina no namolavola ny laharam-pahamehana. Nandritra ny fifampidinihana tamin’ny vondrom-piarahamonina sy ireo solontena eny ifotony, dia namantatra ireo lohahevitra manan-danja izahay manomboka amin’ny fahaiza-miatrika ny fiovan’ny toetr’andro ka hatramin’ny loza ateraky ny tondradrano mba hahazoana antoka fa mifanaraka amin’ny tena zava-misy sy
filàna eny an-toerana ny fikarohana.
Fampifangaroana ny siansa sy ny fahalalana nentim-paharazana
Nampifandray fitaovana ara-tsiansa (toy ny famolavolana modely ara-toetrandro sy hydrodynamika) sy ny fahalalana nentin-drazana avy amin’ny mponina izahay. Ity fitambaran’ny fahalalana ity no nahafahana nanombana ny loza amin’ny fomba mifanaraka amin’ny zava-misy, ary namolavola vahaolana mifototra amin’ny traikefa sy fiveloman’ny mponina.
Fanamafisana ny fahaiza-manao sy fizarana andraikitra
Nandritra ny fiofanana, atrikasa, ary sekoly eny an-kianja, dia nanome fitaovana sy fahalalana ireo mpandray anjara izahay anisan’izany ny mpianatra, tantsaha, ary tompon’andraikitry ny kaominina mba hahafahan’izy ireo mandray anjara am-pahavitrihana sy am-pahendrena amin’ny asa fikarohana.
Fianarana miverimberina sy fandraisana ny hevitry ny mponina
Tsy nandeha amin’ny tsipika mahitsy ny dingana. Niverimberina teny ifotony izahay mba hanamarinana ny vokatra vonjimaika, hizara ny valim-panadihadiana, ary hanitsy ny fomba fiasa mifototra amin’ny fanehoan-kevitry ny mponina.
Fitovian’ny zo sy fifandanjana amin’ny sehatra rehetra
Nampivondrona manampahaizana amin’ny siansa sosialy, manam-pahaizana momba ny toetr’andro, hydrologue, ary mpikarakara vondrom-piarahamonina ny ekipan’ny REPRESA. Niara-niasa nanerana ny sehatra sy fiteny ary andrim-panjakana izahay, mba ho re sy ho lanjalanjaina ny fomba fijery samihafa.
Fampitana hafatra mihoatra ny sehatry ny tetikasa
Nampiasa tantara, tantara an-tsehatra ary sary ho fitaovana izahay, mba hahafahana mizara ny valim-pikarohana amin’ny fomba azon’ny rehetra takarina tsy amin’ny sehatra akademika ihany fa hatrany amin’ny vondrom-piarahamonina izay fototry ny tetikasa.